O Pampallín en Outes, dende os fogares, 30-04-20

O Pampallín era unha festa tradicional galega, que antano se celebraba en Outes, cada 30 de abril con moita sona e éxito. Viña ser un rito de orixe celta para darlle a benvida á primavera, así coma para pedir boas colleitas e que se afastasen os males de persoas e animais. Dito rito, estaba moi relacionado co lume e, de feito, en moitos lugares do Concello, na tardiña do 30 de abril, os/as nenos/as e adolescentes facían grandes laradas coa leña que, con antelación, ían coller ao monte nos días previos. Aínda que, tamén queimaban diferentes obxectos vellos, que lles daban os/as veciños/as.

Por suposto, tamén estaba a parte relacionada cos pampillos, de onde provén o nome do Pampallín e que é a que dende o colexio tratamos de recuperar o curso pasado e coa que, afortunadamente, se puido seguir este ano dende os fogares. Esta parte consistía en ir recoller pampillos, como xa se explicou na proposta da tarefa e logo elaborar os aneis, as pulseiras, os colares e as coroas do que a continuación se dará evidencia.

Queremos agradecer a colaboración das familias e, por suposto, dos nenos e nenas, pois doutro xeito sería imposible logralo. Tamén queremos darlle as grazas a aquelas persoas, que tiveron a ben felicitarnos pola proposta e que nos manifestaran que aos seus nenos/as lles encantara a actividade.   

Agardamos retomar O Pampallín o vindeiro curso dende o colexio e que os/as nenas de sexto, que en breve iniciarán unha nova andaina educativa, sigan celebrándoo dende os seus fogares.

GRAZAS a todos/as. Agardamos que vos gustase a reportaxe fotográfica !!! .